Перфекционизмот наспроти тежнеењето кон успех
Пред да тргнете со промените, важно е да разберете што е перфекционизмот, а што не е. Тој се разликува од здравата амбиција по една клучна работа – фокусот.
Луѓето кои тежнеат кон извонредност можат да бидат задоволни од своите успеси и да учат од грешките. Перфекционизмот, од друга страна, е многу поостар. Перфекционистите се оптоваруваат со секој недостаток, поради што не успеваат да чувствуваат задоволство и гордост поради она што го направиле добро.
Еден од најголемите проблеми со кои се соочуваат е стравот дека со откажувањето од совршенството ќе станат неуспешни. Во реалноста е токму спротивното – промената на таков начин на размислување често донесува подобри резултати. Перфекционистите често постигнуваат помалку од луѓето со поздрави ставови бидејќи опсесијата со совршенство ги демотивира и ги води кон одложување на обврските и други облици на самосаботирање.
Анализа на трошоците и придобивките
Повнимателно согледајте ги своите перфекционистички навики. Можеби верувате дека тие ве прават поефикасни, иако истражувањата покажуваат дека тоа главно не е така.
Перфекционизмот носи бројни негативни последици, а некои од нив веројатно веќе ги чувствувате. Направете листа на сите начини на кои перфекционизмот ви штети вам и на луѓето околу вас. Тоа може да ви даде дополнителна мотивација да се менувате.
Препознајте ги сопствените обрасци
Можеби не сте ни свесни колку перфекционизмот е присутен во вашиот живот. Кога ќе ги освестите обрасците на однесување, полесно ќе ги менувате.
Добра идеја е да ги запишувате мислите штом ќе се појават. Ако тоа не ви е практично, секоја вечер анализирајте го својот ден.
Присетете се на моментите кога сте имале чувство дека не сте доволно добри и запишете што сте мислеле тогаш. Тоа ќе ви помогне во иднина побрзо да ги препознаете таквите обрасци на размислување. Можете да водите и дневник на емоциите што тие мисли ги предизвикуваат.
Фокусирајте се на позитивното
Ако се борите со перфекционизмот, веројатно сте развиле способност веднаш да ги забележувате грешките како кај себе, така и кај другите.
Иако оваа навика е тешко да се промени, можете да ја ублажите така што свесно ќе се трудите да го забележите и она што е добро.
На пример, кога ќе забележите нешто што не ви се допаѓа кај себе или кај својата работа, пронајдете пет работи што ги цените. Така постепено ќе го урамнотежите критичкиот поглед и ќе создадете здрава навика на размислување.
Променете го внатрешниот дијалог
Луѓето склони кон перфекционизам често имаат многу критичен внатрешен глас што им вели дека нивната работа не е доволно добра или дека не се трудат доволно.
Ако сакате да го надминете перфекционизмот, клучно е да го промените начинот на кој разговарате со самите себе.
Негативниот внатрешен дијалог може сериозно да ја наруши самодовербата и да поттикне нездрави однесувања. Кога ќе научите да си бидете поддршка на самите себе, значајно ќе го подобрите квалитетот на животот.
Малите чекори водат до големи цели
Перфекционистите често поставуваат нереално високи цели што не оставаат простор за грешки и учење.
Наместо тоа, обидете се големите цели да ги поделите на помали и остварливи чекори. Не морате да се откажете од крајната цел, но со помалите етапи и наградувањето на сопствениот напредок ќе бидете поблаги кон себе кога ќе погрешите.
На пример, наместо веднаш да одлучите да вежбате пет пати неделно, почнете со еден или два тренинзи. Потоа постепено зголемувајте го интензитетот додека не го достигнете посакуваниот ритам.
Уживајте во процесот, а не само во резултатот
Многу перфекционисти се фокусирани исклучиво на резултатот и се склони да се критикуваат себеси ако тој не е совршен.
Обидете се да пронајдете задоволство и во самиот процес. Можете да се поврзете со луѓе кои имаат слични цели или да водите дневник за тоа што учите и како се чувствувате по патот.
Дури и ако не постигнете идеален резултат, ќе можете да го согледате сето она што сте го добиле преку искуството и трудот што сте го вложиле.
Како да ја прифатите критиката
Ако критиката ја доживувате како напад и реагирате одбранбено, промената на тој став може многу да ви помогне.
Конструктивната критика пружа корисни насоки за напредок и ги претвора несовршените обиди во важни лекции на патот кон успехот.
Ако критиката е груба или неконструктивна, потсетувајте се дека грешките се составен дел од учењето и развојот.
Извор: easylife.rs
